عمو ..عمو يا بتاع الفريسكا
يا بتاع الفريسكا يالي ماشى .. لحظه واحدة
بتجرى كده و ماشى .. ماتيدينى واحدة
دانا بستناك و ماعيزاشى .. غير بس واحدة
بالسمسم .. بالسودانى .. يا عمو أى واحدة
أصلك هتغيب و تنسانى .. و الوِحْده هنا جاحده
برضه ماشى و مش هامك أحزانى على فريسكايه واحدة !؟
أقولك إيه تانى !؟ أعيط ؟ .. أزعَق؟ .. أوريلك جنانى !!؟
شكرا خلاص .. مش عاوزه منك ولا واحدة
أصلى الفريسكا دى .. مرتبطه بحنانى
أيام ربيعى و زمانى .. اليوم من أيامهم ليه شكل تانى
إمتى يرجع بيا الزمن من تانى .. من غير ماقول
إرجع يا زمانى بكل أحلامى
بس ترجعنى أعيَل من عيال جيرانى
16 comments:
أول ما قولتيلي حبة الزعل خلصوا جيت جري وأنا فرحان أوي.. سبحان الله زي ما يكون الواحد ما صدق
أنا متشكر أوي عالبسمة اللي رسمتيها في وشي النهاردة ويارب أتعدي منك وأكتب حاجة بتتنطط كده زي البنت الكتكوتة اللي في الصورة
يارب ديمها علينا نعمة
تحياتي
انت نفسك فى فرسكا من بتاعة زمان وانا نفسى اكون زمان بس للاسف مش كل مره بينفع نكون زي ما عايزين نكون
ومش كل مره ينفع نلاقى اللى كنا عايزينه زى ما المفروض يكون
نعيش ايام زمان دلوقت ...لحظات ويفوقنا زمنا على دلوقت ويفضل عندنا امل نرجع ولو لحظات ونلاقي بتاع الفريسكا من تانى
بالسمسم ...بالسودانى....المهم زى زمان
ذكريااااااات الطفوله الجميله
:)
تحياتي لكي
صعب في هذة الدنيا ان تظل طفل
!!!!
و لكن أن كان أختيارك ستحتاج الي مجهود لتحقق ذلك الاختيار
اولا المدونة تحفة وانت شاعرة هايلة
ثانيا البوست دا يجنن وحسيت انى رجعت لايام الطفولة
وحنيت لها
بس ليا سؤال
انااسمع كتير عن الفرسكة
هيا ايه الفرسكة دى بقى
هيا اكيد حاجة بتتاكل بس عاملة ازاى يعنى؟
:D
تحياتى
اتمنى اكون صديقة دائمة وانك تيجى تزورينى
عزيزتي كارول
لا ادري لماذا تذكرت تلك الكلمات من اغنيه مفضله عندي من مسلسل ليالي الحلميه دائما عندما استمع للتتر انتظر ذلك الشطر بفارغ الصبر
(ليه يازمان ماسيبتناش ابرياء
و واخدنا ليه في طريق مامنوش رجوع
أأسي همومنا يفجر السخيره و اصفي ضحكه تتوه في بحر الدموع)
فعلا ساعات خيالنا بيروح لبعيد و بنتمتي ان ترجع بينا ايام الطفوله لما كنا اكثر براءه و تلقائيه
في نظري ان كل مرحله سنيه ليها بريقها و سحرها لو احتفظنا بالحاجات الحلوه اللي جوانا و ماخلناش اي حاجه تغيرها بس هل ياتري ده ممكن؟
تحياتي علي الموضوع المعبر عزيزتي
:)
انا اول مره اكل فريسكا من سنتين وكانت حلوه موووت
كلامك جميل جدااا ورائع بس مفيش صبر ليه متخليكى ورا بتاع الفريسكه واكيد هيديكى وحده لازم الصبر تحياتى
قنديل
أشكرك , و عذرا على مدونتى هذه
أعلم أن معظم كلامى حزين
دا إذا ماكنش كله
أصلى المشكله إنى بكتب إلى بشعر بيه
لا أملك موهبة التأليف
لقد حاولت .. و فشلت
إستحمل بئه .. ما كلنا عايشنها كده
شويه نصرخ .. و شويه نفرح
أتمنالك كل التوفيق
و شكرا لمرورك الدائم
نورتنى :)
Sokomonoce
و ليه أعيش أيام زمان لحظات
أنا عن نفسى عايشهاها كده على طول
:) عيله
أكيد بنمر بهموم ساعات بتكسرنا
بس طول ما جوانا إمان بقدرة ربنا
على تخطى أصعب الظروف
ماينفعش نشيل هم حاجه تانى
ربنا يبارك حياتنا جميعا
تحياتى :)
micheal
أكيد مافيش أجمل من ذكريات الطفولة
تحياتى ليك أيضا
و شكرا على مرورك :)
Carol
لا تقلقى يا عزيزتى
دى أسهل حاجه عندى :))
نورتينى
Hadota
شكرا على ذوئك و كلامك :)
اما عن الفريسكا
هى حاجه جميله بتتاكل
مش عارفه أوصفهالك
لو كان فيه رسم هنا كنت رسمتهالك :))
و خايفه أقولك حاجه زى الرقاق كده
تطلعى ماتعرفيش الرقاق كمان :))
شوفى إسألى أى عيل فى الشارع هايقولك
و مادام جيتى هنا .. فانا أول عيله هاتقولك :))
هى مثل الرقاق بس صغيرة
فى حجم العشرة قروش كده
و بتكون طبقتين و بينهم السودانى
أو أى شىء مثله .. سمسم مثلا
إبقى زورينى المره الجايه
وأنا هاشرحلك إيه هو السودانى ده :))
على فكره, أنا أخر مرة شاهدت أو أكلت فيها الفريسكا كانت تقريبا
:( من أكثر من 15 سنه
يعنى ممكن الموضوع يكون إختلف خالص
و أنا إلى أتمنى إنك تكونى صديقه دائما
:)نورتينى
اجندا حمرا
كلما مرت الايام بينا
رسمت فرشتها على وجوهنا علامه
و كلما دار الزمن بينا
غير فينا إلى كان فينا
أشكرك يا جميله
إنتى إلى روحك طيبه :)
ضد الظلم
يا بختك .. أنا لم أكلها منذ بعيييد كان عمرى ساعتها أربع سنوات
يعنى من سنه كده :))
فعلا , الصبر جميل
ما هو لو كان صِبر القاتل على المقتول
:)) كان ربنا إفتكره لوحده
من غير مايقتله
تحياتى
ههههههههههههه
السودانى والسمسم اعرفهم طبعا والرقاق كمان
مش للدرجة دى يعنى
وبعدين يابختك انتى كلتيها
انا عمرى ما كلتها
:))
Hadota .. حدوتة
:)) طيب كويس
ربنا يوعدك بحد يجبهالك
بس إبقى إفتكرينى بحته ;)
تحياتى
و نورتينى
:)
Post a Comment