welcome 2008

Merry Christmas
and
A Happy New year

تفتكر .. !؟

يا ترى لسه زى ماحنا زمان !؟
ببراءة الأطفال و الخيال !؟
نفرح من قلوبنا .. ولا هَم عَلى البال
ولا عارفين ألوان السِنين
ولا حتى حاسبين لأى إحتمال
و مع كل عيد نطلب و نسأل
هانجيب إيه جديد !؟
و نِدبْدب و نعيًط .. عاوزين كل الحاجات
ونجرى نعلق فى الشجرة الكور و الزينات
و نِبات سهرانين مُترقبين من سُكات
نسمع صوت جرس أو نحس بخطوات
يمكن لما يجى نشوفه .. و تتحقق التنبؤات
و نصحى نلاقى فى أحضانا لفه بفيونكات
و يقولوا ده عدا و ساب هديه ملفوفه بحركات
و نفضل نِنده .. يمكن نشوفه كده ماشى هناك
و تبدأ سنة جديدة و معاها شوية أمنيات
و نِدعى من قلوبنا
إنها تكون أجمل و بصحه مش بمسكنات
و التعلب فات فات و فى ديله سبع لفات
*
*
من فضلك أترك العيدية .. بعد سماع صوت الصُفارة
;)
كل عام و الجميع بخير

يا ستّار


دخلت قلب أدور على ساتر
أحتمى فيه من غير ما اكابر
دخلت و قولت أنا .. يا ساتر
لاقيت جدران قديمة مشخبطة
و سلاسل كبيرة مربطة
وجراح كتير مش متْضمضه
و زحمة كلام و أحلام زمان
وناس كبيرة , وكمان عيال
بالرغم من البعد و طول المشوار
بس إلى بيدخل القلب بيتحول جدار
و لو خرج .. فى ثانية بيتهد العقار
علامات كتيرة منحوته فى كل مسار
مع كل أزميل بينحت و مسمار
بالتاريخ و اليوم .. دا الجرح بتار
وقفت أدعى من جوه القلب
يا ستّار .. يالى شايف الأزمة
إوجِد المسار

حالة إنتظار


انا قلبى ده قارب خشب
لكن ياخساره شراعه مَكسور
كان نفسه يوصل لكل قلب مشطور
يعطي له شريانه لحد مايُصلب الطول
لكن الريح شِديد والموج بيثور
و انا حِملى كبير و مازلت صبور
مع كل شط بقابل ناس
ترميلى فى حمل وتسيبنى أحتاس
وارجع من تانى أجدف بحماس
مجدافى قلم و فٌرشه و حبة أحبار
بس تعبت خلاص من طول المشوار
داب منى قلمى والفُرشه غاصت فى البحار
و لسه ساكت بادعى و فى حاله إنتظار
إن ربى يرشدنى بنور الفنار

إدينى فُرصه

إدينى فُرصه أرسملك فكرة
إسمعنى وانا اوصفلك بُكره
انا عارف إن جوه قلبك نُقطة
مع إن قلبك طيب بالفطرة
و بقوة إيمانه هايعدى المِحنَه
بس إثبت بِجداره.. إنك قد الشِدة
وهو سامعك و هايبعتلك بركه
دا نوره فى قلبك .. لأنه ساكن من جوه
وفى وجوده ..إوعى تحمل هم
ولا حتى تزعل لحظه

لحين ان يأتى

لحين أن يأتى حلم بُكره
حين اسمع نبضاته بعافية
و حين تصبح أحزانى ذكرى
حتى ارسم بفرشاتى بسمه
تُسعد قلب شاعر بوخذه
سوف أعرف ان الله قد إستجاب لى

قدر و مكتوب علينا


نِبات ليالينا رسمينه فى عنينا
حِلم بكرة إلى غالى عَلينا
و نصحا نقول يارب نِنول
و الحلم ده يبقى حقيقة فى إيدينا
لكن الإنسان بطبعه مَلول
من الدنيا وإلى عَملاه فينا
يُصبر شوية و لما صبره يطول
ويتسجل حلمُه فى سِجلات ماضينا
يصرخ ويقول تعبت .. و الدنيا غدرت بينا
نسكُت و نحبس الدمع فى عنينا
قبل ما يلمع و يتكلم علِّىِ فينا
مش عارف إنه قدر و مكتوب علينا
دا إلى بين إيدينا النهاردة
ممكن بكره مايكنش لينا

يا إنسان ..!؟

عافر يا إنسان و اُخرُج من قُمقُمك
مهما طال بيك الحال , مسيرها تزول شدتك
أُصبر دا الصَبر جميل و قول يارب بس رحمتك
هو الى هايوصفلك الطريق و بنعمته هايرشدك
دانا جوه قلبى حجر كبير خَبيته لا يلخبط خطوتك
و ارسملك الضحك و ادارى الآنين لا تعرف و تغير سكتك
عيش و إفرح بالسنين و ابعد الحزن عن دُنيتك

انا كده من زمان

خنأنى الكلام إلّى جوه قلبى من زمان
ساكت و شايل أحزان غيرى .. بس فرحان
و صابر بَريّح كل قلب تعبان
لحد ما يطيب .. ويقولى سلام
بحزن و بفرح .. ما انا برضه إنسان
ليا مشاعر و قلب و كيان
و كل مانكسر .. بتزيد الاحزان
مملُكش من الحظ ولا حَبة رُمان
و بتخلص القصة من قبل العنوان
يرضيك كده برضه يا زمان ..!؟
أسكُت كده و تشيلنىِ فى أحزان
لا نافع معاك نسيان ولا حتى جنان
أفضل حاجه إنى أعمل فرحان
و إلّىِ يسألنى هاقوله
دا انا كده من زمان
:)

علَمنى يارب

صمتُ لكى تسمع نبضى
لكى تدرس حالتى
لكى تهمس فى أُذنى
و لكى تُرجع خفقان قلبى
و تُضمد جراحات نفسى
لكى تسمع صلاتى
و تَكُفنى عن بُكائى
لكى تًرشدنى لطريقى
علمنى أن أصنع مشيئتك يارب

هو ده حلم ..!؟

كانت أحلام بسيطه بس جميلة
أصلى بَحلم أعيش زى العيال
اجرى و اللعب ولا يشغلنى حال
ابكى واضحك من شقاوة الاطفال
واخٌد مصروفى واجيب بِه فشار
واتفرج على ميكى و بلاش بكار
أصلى دى احلامى بِجَدْ بس كلها هزار
وسعات يخطفنى فكرى وياخدنى بعيد
لسما صافيه و مَيه وصوت تَغريد
و نسمه هاديه و ورود و يوم جديد
هو ده حلم ..!؟ ولّه حجة البليد

وَجه اّخر


قررت ان أنحت وجهى

بملامح مختلفة عنى

و أن أمتطى سفينة الرحيل

لكى تُبحر بى فى بحرها العثير

ربما سوف أذهب إلى عالم اّخر

عالم لست منه و ليس منى

له منظومه منفرده بهِ

سوف ارحل كحُبيبات الرمل

لا تملك ثُقل للثبات فى مكان

لا تملك أرض أو وطن

و لا تعى شىء عن الزمان

سوف أرحل على تلك السفينة

لا أعلم أين أو متى سوف ترسو بى

فقط .. سوف أترك هويتى ....و أرحل

عارف ..!؟

يا طيرى يا ابيض .. طِير بدالى و لِف الكون
طير مرة عشانى ولو بجنون
إفرد جناحاتك و ماتنزلش فى يوم
علمنى أفضل تملى فوق
أطير بروحى من كل الهموم
طِير و إسمحلى أكون مَعزوم
بروحى معاك على غُصن زيتون
طيب .. طير و إوصفلى إيه دًنياك ..!؟
شايف حالنا إزاى من فوق ..!؟
عندك غدر و قسوة هناك ..!؟
عارف .. انا كان نفسى أكون
طِير و الِف بنفسى الكون
لا فى قلبى حُزن .. ولا احمل هموم

كان يوم زى أى يوم فى الكون

يا فرشتى .. مالك على طول بترسمى كده بالغامق !؟
هو يعنى مافيش لون غير لون أحزانك !؟
ماهو أصلى ألوانى من بالتة أيامى
برسم احلامى و أنساها فى ثوانى
و ارجع ارسم ملامحها من تانى
و أدوُر فى دايرة زمانى

غمضت عينيا .. و سرحت بعيد
و رسمت وردة و شمعة عيد
وردة واحدة بس أورائها قَلّت
و بصيت للوحتى كده من بعيد
لأيت الوردة دى زهرة شبابى
و الشمعه كانت بمناسبة ميلادى
و لو فى تورته .. هاهديها لكل أصحابى

عمو ..عمو يا بتاع الفريسكا


يا بتاع الفريسكا يالي ماشى .. لحظه واحدة

بتجرى كده و ماشى .. ماتيدينى واحدة

دانا بستناك و ماعيزاشى .. غير بس واحدة

بالسمسم .. بالسودانى .. يا عمو أى واحدة

أصلك هتغيب و تنسانى .. و الوِحْده هنا جاحده

برضه ماشى و مش هامك أحزانى على فريسكايه واحدة !؟

أقولك إيه تانى !؟ أعيط ؟ .. أزعَق؟ .. أوريلك جنانى !!؟

شكرا خلاص .. مش عاوزه منك ولا واحدة

أصلى الفريسكا دى .. مرتبطه بحنانى

أيام ربيعى و زمانى .. اليوم من أيامهم ليه شكل تانى

إمتى يرجع بيا الزمن من تانى .. من غير ماقول

إرجع يا زمانى بكل أحلامى

بس ترجعنى أعيَل من عيال جيرانى



حبة زَعل


زعلان على حلم كان و كان !!؟
و إن قلبك لساه غلبان !؟
زعلان إن عٌمرك جرى طيَران !؟
هاتٌصبر من تانى .. ماخلص المشوار
دى لوحه و إترسمت بلون الحنان
قسمتها إيد بسلاح بتار
حولت من تانى كٌل المسار
هاتقبل من تانى تتحمل الإنتظار !؟
ما انت شايف .. فى ثانيه بيطلع قرار
و ترجع من تانى تعلّىِ الجدار
ما هو غصب عنى .. سرقتنى أحلامى
و كأنى عايشة جوه عالم تانى
و أفوق من الحلم و أصحى
على نفس أرضى و زمانى
و أرجع من تانى تصعب عليَا نفسى
ياما نِفسى أقفل عليا بابى
و اسكٌت و محلمش من تانى
كفيانى وجع قلب و حيرة
دى أحزانى كتيرة و مكفيانى
عارفه إن الدٌنيا صعبه
بس الأصعب .. إنى أنسى أحزانى
مع إنى ناسيه الدنيا و كيانى
و عايشه الدٌنيا للناس.. مش عشانى
بس شاطر يا زمانى
عرفت تسرق منى أحلامى
و بقوة و ثبات .. تًقص شُريانى
تفتكر نبضى هايضرب من تانى !؟

ما تقول يــا رب

هاتفضل تشكى و تًصرُخ لمين !؟ .. ماتقول يــا رب
بَطْل تجرى شمال و يمين .. قول يــا رب
رَبك ده وحده عارف بالغيب.. و من غيره هاتتعب
هو بس سامع للأنين .. و بكُل كَرب
إرفع قلبك و معاه إيديك .. و إدعى يـا رب
هاتجرى و هَتوصل لحد فين .. من غير الرب
و حًزنك إلىِ فى قلبك و دمع العين .. دى تجارًب من عَند الرب
هو وحده إلى مادِد إيديه و بيحمِل عنا كًل التَعَب

إضحك .. يمكن الصوره تطلع حلوه



السعادة عُمرها ما كانت بالكلام

لو السعادة في الكتابة .. دا أنا أكتب لك ديوان

السعادة مش كلمه أو لوحه فى برواز

لو كانت كلمه .. أقولك كلام يعدلّك الميزان

لو السعادة إنك تضحك .. دا أنا أعرفك على أكبر بهلوان

لو كُنا عايشين كده حياتنا

خلينا صادقين هنا مع نفسنا

إضحك عشان الصورة كده مش حلوه

يا عٌمرى يابن اللذينه


يا عٌمرى يابن اللذينه
بتجرى كده ليه !؟
هو فيه إيه ..!؟
مِستعجل ليه على طول !؟
ماتمشى يا سيدى بالمعقول
شاددنى كده وانا غلبان مِسكين
وعمَال ترميلى يا عٌمرى فى سنيين
والآ ما تجرى
برضٌه لسه صٌغيرين
بالرغم من هموم السنين
والحٌزن إلى جوه مٌستكين
برضه هافضل صٌغير
حتى لما اكمل الثلاثيين

والله لو عَملت إيه



والله لو عَملت إيه
لو حتى مشيت على الحيط
ولاّ رًحت و جيت
لو بصيت عليك و قولت كل إلى بيك
و حتى لو صَرخت بعزم ما فيك
و شوحت بطول إيديك
عًمرك ما هاتوصل لشىء
طول ما الجِبال عالية حواليك
طول ما الصمت فى عينيك
والسلاسل مِكتفه رجليك
ما انت لو كان ليك حَد يواسيك
ما كان الزمن يلاطش فيك
إسمعها حِكمه من المجانين
ما تسلمش عَقلك تانى حتى لو كان لمين
بدل ما تعيش كده فى التوهه سِنين
وكاس المًر يا حلو تشرب منه بَرميل
إنت لسه مستنى تعرف و بعدين !؟
ما خِلصت الحكايه على كده .. يا ابو مًخ تخين


يعنى هى كانت نأصاكى يا دنيا تِكسرينا !؟


يعنى هى كانت نأصاكى يا دنيا تِكسرينا !؟

داحنا ماشين معاكى بالتيله

تدينا من حنانك .. وفى ثانيه تِـئسى علينا

هو ده يعنى قدرنا والُى مَكتوب علينا !؟

ما تسيبينا فى ليالينا عايشين

فى حالنا و مع همومنا مِتعودين

يعنى إنت يرضيكى كده نعيشها مِستسلمين !؟

أحلامنا تتسَرسِب من بين إدينا ولا إحنا حاسين !؟

الناس بتيجى و تلاطش فينا و فى الآخر.. مُتأسفين

كنا طالبين منك يومين .. نعيشهم بس فرحانين

إديتينا اليومين و كان صَداهم كله أنين

طب الفرح .. سيباه لمين ؟

يا بخيله.. ليه بتجرى بِِه سينين !؟

ياستى عارفين .. هانسبها و مش واخدين

بس إنسينا بئه مَحنا مش نأصين

عاجبك أوى صوتى الحزين

و الدمعه إلًى بَئت علامه فى العين

ماهو لِسه مَجاش حِساب المَلاكين

عَلشان أسيبهالك و تلاطشى فى ناس تانين

أرجوكى .. لو مش ناويه تفرحينا

سيبينا بس نعيش مِرتاحين

ولاّ أقولك .. مُتَشكرين

دا إنتى بِجد تِجَننى العَاقلين

هو انت فى الدنيا بتدور على وش !؟

هو انت فى الدُنيا بتدور على وش !؟
دا الدُنيا فيها ألف و مليون وش
وش يضًحك ووش يِبًكىِ
وش يساعد من غير مايشكى
و فى وش بياخد و مايفكرش يدى
قولى إنت و من غير ماتغش
هاتكمل حايتك كل يوم بوش ؟
طيب و فى الآخر.. هاتقبْله بأى وش ؟

كما أنت .. لا تُجهد نَفسك

لا تتكلم .. فالصمت أحياناً مُفيد
لا تتنفس .. فربما تحتاج لتلك الانفاس فيما بعد
لا تُفكر .. حتى لا تشغل بالك بما هو تافهٌ لديك
لا تَسمع .. لأنك لا تريد أن تفعل شىء
لا توقظ ضميرك .. حتى لا يُعرقل طريقك المنشود
فلتكن كما أنت .. لا تُجهد نفسك
فقط إمضى فى طريقك
ولا تنظر للخلف حتى لا تتعثر فتسقط
ولكن لابد أن تُدرك كَم من حصاد أيامٍ ماضيه تملك
و هل انت راضى ان تسجلها فى سجلك السماوى ؟
فهى محسوبه عليك .. فهل تقدر؟

إُصرٌخ يا مِسكين .. و مين هَيسمعك ..!!؟

إُصرٌخ يا مِسكين .. و مين هَيسمعك ..!!؟
إجرى واهرب .. و لفـين مَهربـك
ظُلم و قَسوه .. ونفـوس بتوجَعـك
أمانتك وحُبك فى الدُنيا .. إلٍى مِضيَعك
دى مش مٌشكلتك .. ولا غَلطـتك
دى مٌشكلة زمانك .. إلىِ سَدلك سِكتك
إلىِ من تانى بيرجْعَك .. لسبب مَهربَك
وَلاََ مُشكلة جِنانكْ و حَنانكْ .. و طيبتك و فطرتك
إلِى بتزود بيهم .. يا مَجنون بَلوتكْ
كل ده .. ولسـه بِتـلوم !؟
ده المَظلوم ليه يوم .. بألف يوم و يوم
أٌشكر أحسن .. و بلاش تِـلوم
بَلاش هُموم .. و حُزن مََدْفـون
و إن وَجَعـك قلبك .. من بين ضلوعك إخلعُه
و بلاش تانى ترجع .. للحُزن يضيعك
و ينسيك أيامك .. إلى بتسـرئَـك
هايجيلك يوم تعيشُـه .. مَجْـبور ومَسرور
أٌشكر .. و الحزن ده كُله يـزول
المٌهم تتأكد .. إنك مش مخبول
إنسىَ .. ولوان ده مش معقول

صمتُ الألحان


أعزفُ بكلماتٍ الحاناً صامته
لعلها تُرجع إلى نفسى صدى المعانى


يا فُرشه و رسمتى بلون الورد

يا فُُرشه و رسمتى بلون الورد
رسمتى جوايا فرحه شَقيه
رسمتى بسمه بسعاده وحب
و كلمه صافيه من جوه القلب
دى الفرحه بسيطه .. بس جميله
يا سلام لو تِفضل فى قلبى شويه
كنت أجرى و أطير فى الدنيا ديَه
و ألمس النجوم لأ.. كمان شويه
و أملا الكون بأجمل لون
لون القلب الصافى الحنون
آه لو يستحملنى زمانى شويه
و القدر ينسانى الايام الِى جايه
دانا أكون أول إنسانه
بالكلمه مُكتَفيه

يا مَقص أحلامى ..! أروح مِنك فين قولىِ انا ..!؟


يا مَقص أحلامى ..! أروح مِنك فين قولىِ انا ..!؟
فِضلت تقُص و تقصَر فى أحلامى .. شُوف على كده من كام سَنه
أحلامى خِلصت و إنتَهت .. و مِش باقى مِنها إلاَ انا
قَصقصْت أحلامى يوم بعد يوم .. و لا بيصعب عليك منها أى يوم
دا يِظهر العِشره عَليك بتهون .. ولا ينفع عِتاب ولا حتى لوم
وآخر حِلم دَه قَصيته إتنين .. حِلم فى القَلب و التانى فى الغِيب
و هُما الاتنين حِلمين طَيبين .. بس مَافَضِلش مِنهم غير قلب حَزين
كاتم جواه جَرحُه الدَفين .. و بيضحك من غُُلبه و يدارى الانين
و الحِلم جواه لساه مش مُستحيل ..مِستنى من بِعيد و مَادد الادين
نِفسه يعيش فى دُنيا المَجانين .. أصلُه مش عَارف يروح لِمين
دا مِن بعد ما جَرحُوه الناس الطيبين .. رجع من تانى يِعيش حَزين

ليـــه زَرعنا القسوه بعقولنا.. !!؟

لِيـــــــــــــــــــــــه .. !؟
هو حرام نِفرح ؟ حرام نِحلم ؟
ليــــــــــــــــــــــه ..!؟
ليه مَفيش دايماً فُرصه ؟
وبِنقتل جوانا الامل فى بكره؟
ليه بِنحب دايماً نِجرح ؟
ليه بِنسعى ننتصر على ضعف غيرنا ؟
ليه ماسكين لبعض مشرط و بقسوه نِشَرط قُلوبنا ؟
ليه بَطلنا نِرحم ؟ ليه بنِقفل عيونا و ضَميرنا ؟
ربنا خلقنا بالرحمه فى قلونبا
راميناها .. و زَرعنا القسوه بعقولنا

سوف يظل فى خوفه مُستكين .. ينتظر


ليه لما بنحب نفرح بنخاف ؟
هل السعاده فعلاً قصيرة العُمر ؟
أم اللحظات الجميله أصبحت قليله بالفعل فى حياتنا ؟
أعلم إننى أشعُر بفيضان من السعاده, ولكننى أشعر بالخوف و القلق
يُخيم على مشاعرى أيضاً .. اشعُر بإختناق فى جفونى من ثِقل الدموع بها
ظللت كثيراً أحلُم بأنَ السعاده من المُمكن أن يطول عمرها و لو لمره
ولكننى أيضا أعتقد إنه مهما طالت هذه الفتره سوف تمُر كما لو كانت لحظه
آااه ..!! ياله من إحساس نسيجه من الحزن و اليأس و الضعف و الوحده
نعم ينتابنى أحياناً إحساس بالوحده و الإنعزال عن الدُنيا
إحساس قاسى يملاْ كيانى .. يا ليتنى ما حييت لتلك اللحظه الصعبه
إننى لا أقدر على مقاومتها .. فهى تجعلنى أشعر كما لو كان
طفل صغير تائه من أمه فى وسط الزحام .. ولا يعرف متى ستعود
هل سوف تسعى جاهده على أن تعود إليه ؟ هل ستحاول أن تنساه ؟
أم سَتظل تتذكره و تمُد يديها الحنونه إليه مره أخرى
هل ستعود لكى تشعره بالامان و الحنان مرةً أخرى ؟
هل سوف يجد من يُجفف دمُوعه فى وقت الضيق ؟
من يحمله فى وقت التعب .. من ينصت إليه حينما يريد أن يحكى
إنها كانت تعطيه أكثر من ذلك , يكفي وجودها بجواره
دون أن تهمس بكلمه .. فهذا وحده كافى لكى يشعره بالامان
و الراحه .. إنه سيظل فى سكون ينتظر أمه
ينتظر كُتلة الحنان و الطيبه
سوف يظل فى خوفه مُستكين
كحمل أبكم صغير فى صًمتْ .. ينتـظرها

حِلم صُغير بَس بَرىء



طفل صُغير وماسك فى إيد أمه
لا قادر هو يسبها , ولا قادره هى تضمه
محتاج للحنان و الأمان
عاوزه تِسيبٌه للدٌنيا بسلام
يٌصرخ و يمسك أكتر في إديها
تدفعه هى بكل قوتها
يقولها أنا شايفها قسوه و مَحبه جَافه
تقوله ده إهتمام , و أصعب حرمان
يُطلب إيديها .. يِعيش جواها
تقوله عندك الدنيا .. بحُبك إمْلاها
أنا بحلم طول عمرى بِحنيٍت عِنيها
و إيديه الصغيره تعيش فى إديها

إديهَ مش ليك , و حِلمك ده ليك

مادام إخترت تحلم

إحلم بس من غير ماتندم

طير صغير قلبى , نفسه من الحب يطير

لأ, دا بين ضلوعك لساه بالحب أسير

دا ماليان من الحب و بيفيض

بس الجروح جواه عمَاله تزيد

لسه فى العمر أودامك كتير

إتعلم تعيشه و بعدين إبئَه طير

هى إيه الحكايه .. !؟


فى عينيك يا قلبى لامعه شَئيه
شايف فيها براءه و حِنيه
هو إنت رجعت لجِنانك من تانى !؟
مع إن جواك لِسّآك أحزانى
عَمال بتِجرى بعِزم مافيك
و عاوز تِمسك النجوم بإديك
عايشها جنان و خيال شَغال
و الناس تسألك ترد بسؤال
هو حرام أعيش مرتاح البال !؟
حتى لو هاعيش فى دُنيا الخيال
و ألعب و اجرى زى العيال
كفايه بس أعيشهم دانا كده غلبان
و احلم بِبُكره من غير أحزان
و الحب يفيض زى البركان
ويخلينى أفرح وأطير طيران
هو كتير عليَا أعيش لى يومين ؟
طب ساعتين أو حتى ديقيقتين
ده يكفينى بس نظرتين حِنينين
أو حتى يكفى سؤال الطيبين
ده القلب الميت لو يرجع يعيش
اللحظه معاه مابتتنيسيش
زى ما قال كده صلاح جاهين
إنشد يا قلبى غنوتك للجمال
وأرقص فى صدرى من اليمين للشمال
ماهوش بيعيد تفضل لبكره سعيد
ده كل يوم .. فيه ألف ألف إحتمال
و عَجَبه

ياااالآ يا مجانييين


ما كُنا يا قلبى كده عايشين
شاربين من الظلم و عايشين راضين
من قَسوه و غدر و مستحملين
من جوه بنُصرُخ ولسه ساكتين
من دَمع فى عين شايلينه من سنين
هو انت لسه جواك حنين .!؟
إسكت أحسن , أصلك هاتشكى لمين
ماهو شايفك و سامع الأنين
إسكت وإلا تصحى النايمين
و يجولك يسلموك لمستشفى المجانين
وتِفضل تُصرُخ وتقولهم .. ياااالآ يا مجانييين

هيه الاّيه إنـقـلبت ليه !؟


إتعلمت فى حياتى إنى أسامح و أعتذر , أعتذر عن أى فعل أو كلمه
قيلت عن قَصد أو بدون , أجد راحه نفسيه كلما بادرتُ بالاعتذار
لدرجة إننى أصبحتُ أنوب بالاعنذار عن الاخرين للأخرين وألتَمِس لهم الاعذار
فأنا لستُ بملاك ولا أُحاول أن أرسم صوره معينه لنفسى , بل للأسف
أنا كذلك , و للأسف هذا السلوك أصبح رمز للضعف و قلة الكرامه
فى هذا الزمن (هذا رأى كثير من الناس و الاصدقاء أيضاً ).. ولكنى
لستُ اتبع هذا الزمن , ولستُ بإسفه علىَ إسلوبى هذا
بل أسفه على هذا الزمن, الذى قلبَ كل الاّيات لأن هذا أمر طبيعى
وأعتقد إننى مثلى مثل كثير من الناس يُفضلون تحويل الخد الاّخر أيضاً
لكن القضيه التى أودُ مشاركتكم بالرأى فيها ليست عنى
بل عن إننا أصبحنا بنعتذر عن الكلمه الطيبه , او السلوك المتحضر
بمعنى إنك إذا إمتدحتُ شخصِ ما ووثقت به , سَتجد فى كثير من الاحيان
سوء تقدير لهذه الثقه , و تجد نفسك بتعتذر عن هذه الثقه التى منحته إيها
و الغريب أيضاً إنه إذا وُجدَ شخص أمين و يتعامل بصورة طبيعيه فى الدنيا
يمتدحوه و يصور كبطل الابطال , لمجرد إنه تعامل بصدق و أمانه
مثل الشخص الذى يجد ( صُورّه من الدنانير كده) أى مبلغ مالى
نجده بطل على صفحات الجرائد .. مع إن هذا أمر طبيعى جداً
لم أعرف , لماذا عََادُلنا عن التعامل بمِِصداقيه و أمانه
هل جفت قُلوبنا من الرحمه
لماذا أصبحنا لا نملك إلا الاقنعه
لماذا نريد أن نأخذ كل شىء , دون أن حتى نحاول أن نُعطى
أصبحنا نبخل حتى بالكلمه البسطه الطيبه
حتى لو كنا نعلم أنها تكفى لسعاده إنسان
حتى أنا أصبحتُ بارعه فى إضحاك الناس
وإخفاء أى شىءٍ اّخر يؤلمنى .. ولكنى أعتقد إننى
لستُ بمخادعه لأحد سوى نفسى
و أنا و نفسى هانتصرف مع بعض
شكراً لكل من أضاع وقته فى قراءة
ثرثرتى .. ولكنه أمرٌ مستفذ
للمناقشه

هم يضحك .. و هم يبكى


وصفوك يا كلبى ليه .. بالهم و الاحزان
مع إنك يا كلبى دايماً .. فى دوامه النسيان
وَ لآ يمكن حٌزنك تقـل .. لحد مَفاض و بان
مع إنك ماشى بتضحك يمن و شمال
و سايب الناس تسأل 100 ألف سؤال
هو ده حاله كده .. ولآ ده بغزال .!؟
أصلك واخد يا كلبى فى الصبر نيشان
بس خلَى بالك كده أخرتك المُرستان

تعالى و إسمع شـوية هلاوس


تعالى و إسمع زى ما بنسمع

مش إنت إلى جاى الكون ..!؟

تعالى و كون

كون زى ما تكون

المهم تكون

كون إنسان بسيط فى الكون

كون و إتغيـر مع كل لون

بس المُهم تِثبَت بِلون

خليك أحسن واضح و صَريح

بَدل يا حلو ما تكون

فى الظًلمه جواك مَكْنون

عيش و حب وإدى بحنان

عيش و شوف غدر الزمان

كون إنسـان بميزان فنـان

حتى لو قالوا ده مرُستان



مالك يا قلبى ..ماشى مكسور !؟

مالك يا قلبى ..ماشى مكسور !؟
مالك مهموم فى الدنيا مجبور
عِيش حياتك وإحلم و إفرح
دا بكره العمر ده كله يزول
إسعِد بحُبك كل الارض
لحد ما توصل لتحت الارض
و توَصل الفرح لكل قلب
ماهو إلىِ خارج من القلب .. بيوصل للقلب
عيش حياتك بالطول , بـَس مِش بالعرض
أصلى الطول ده طريقه مَعدول
بس إفتكر الاول تقول يارب
الحزن ده يزول .. من جوه القلب

يا إنســان .. لـيك ســؤال ؟


يا إنسـان .. لـيك ســؤال ؟
تفتكر الحياة تسـتحمل كل ده !؟
ليه بتعيش فى الدنيا و تِجرح
ليه بتسىء و تبطْل تِمنح
ليه بتفرح وانت بتدبح
عيش النهارده و بَلاش غُيوم
بلاش تزود فى القلب الهموم
بلاش تقول على الكل مَلعون
ده فى رَب ..هو الِىِ بيقـول
شِئت أم أبَيت .. كٌلنا مَاشـين
كلنا ضالين .. لفين رايحين
و الناس بتشترى الزِيف و بالملايين
زواء من الخارج .. بس القلب لَعين
تضحك و تفرح على كل حزين
و يمكن بإديهم الضمير رَامين
زيد أساوه وعداوه وإجرح
و ربنا بمحبته هو إلِى هَيمسح
ده كل دمعه تـئنْ ..و كل عَزمِة اّه
ليهم كف يحن .. لرب سامَع صَلاه
كٌلنا بنعرف نقول ياربُ
لكن مين إلى من قلبٌه .. بيشكر الرب !؟

يا بَالتـة حياتى .. ألوانك إتلخبطت


يا بَالتـة حياتى ألوانك إتلخبطت

كَونت لون جديد بالدم مصبوغ

و فرشه بترسم جرح مفتوح

و الكَادر مشوه و أكسه ملوح

سَاعتها هتقول دى غلطة رسام !؟

ولاَ لازم تقول دى رؤيه فنان

رسام و نحات و فاحص قلوب

حتى لو رافض معرض الحياة

الدعوة مفتوح و الوقت للمنتهىَ

فى إيدك حريتك و فى جيبك دعوتك

بس وانت ماشى لازم تعرف يا حلو أخرتك

قُولى إيه هى السعادة ..!؟

قُولى ..إيه هى الســعادة.!؟
إنك تشرب قهوة سُــــــــــكر زيادة ؟
إنك تعرف تِداوى ..وانت مَكسور ؟
إنك تِعيش الحَياة .. وانت مََجبور ؟
إنك ترسم ضِحكه .. وانت مَهموم ؟
إنك تِوصِل وانت مَعـــــــــزول ؟
إنك تِدعىِ .. من غير مَتقــــول ؟
إيه هى الســـــعادة ..!؟
إنك تِحلم .. ومش مُهِم تِنـــــــول ؟
إنك تقول أْلف اّه ..وانت مَكتــوم ؟
إنك تِكتب كل دَه .. و تقولى دَه مش جنون؟
إيه هى الســـعادة ..!!؟