اصوات

وقفت فى سكونى اتمتم بصوتى
لا طلع لى صوت ولا سِكنتْ جروحى
يعنى هو ده كان صمتى ولا ده صوت هبوطى
مانا قابلت فى حياتى اصوات كتير مزعجه
بتظلم و تجرح ولا تعرف غير الأذى
و صادفت كمان اصوات جميله حنينه
بتزرع فى القلب فرحه ولو بكلمه طيبه

حاله صعبه

بمشرط و مشى فى كل إتجاه

يمين شمال لحد ما تاه

لا عرف يعالج ولا سابه للحياه

و لما حاول يداوى بحكمه و ذكاء

تعبه زياده و آل دعاله بالشفاء

يا نفسى شيلى من جواكى الهموم

دا ربك شايف و حاسب باليوم

انا عارف و فاهم و بالعقل موزون

و لو نمت يوم و دمعى فى الجفون

أكيد عند ربى نَفسى مش هَتهون

و بصوت عالى وقفت أقول

يـا صبر إدينى من عندك شويه

و إنتى يا حكمه حِنى عليا

دانا وحيد و تايه فى الدنيا ديه

و فاضلى يومين إلا شويه

و أروح برجلى للعباسيه

بجِملت باقى الهلاوس

كتبت و حرارتى عاليه حبتين

بضحك و بسأل .. ها وبعدين !؟

و أعدت افكر فـ إلى فات من سنين

إكتشفت إنى بكتب كـ المسطول كلمتين

ما كل سنه برصد و أسجل هلاوس حياتى

أعيط وادبدب على الارض كتير

و اقول زودونى سنه فوق كل السنين

و أنسىَ و الوّن من تانى أيامى

يوم لونه هادى و صافى

و يوم أشوفه مكتوم كالرمادى

ماهو النهارده و بالتحديد

يوم تاريخى بس عبيط

يمكن إتولدت من غير زغاريد !؟

هو انا مُخى ساح للدراجادى

ياااله .. بجِملت باقى الهلاوس

مُتشكرين

ساعات بنتعشم فـ ناس بزيادة
و نفتكر إن سؤالهم مش مجرد عادة
و إننا بنفرق معاهم إن غبنا او إتنسينا
و نتوقع إن لمحونا فى مَره مكتومين
يهتموا و يحاولوا يريحونا بكلمتين
أو حتى يسألوا عن سبب التغير !؟
يمكن علشان حفظونا ساكتين
إذا كان كده .. يبئا إحنا المتأسفين

طيب ماشى ..انا ضمن العيال

سؤال بسيط بس يحيّر
و كل مافكر أحتار فيه اكتر
و بلون واضح سألت السؤال
هى الصراحه و الوضوح..سذاجة عيال !؟
يمكن سؤالى مجرد غباوه
فى زمن المَكر فيه ذكاوه
و أقنعة الصِدق و ميل الإتزان
حتى القيم كانت ايام زمان
و إن قولت بصراحه انا إنسان وَحدان
مش حِمل خِداع دا انا فالأساس غلبان
تصبح كوره فى رجلين الجدعان
طيب ماشى .. انا ضمن العيال
:P

و ده جَد ده .. ولا هِزار !؟

و ده جَد ده .. ولا هِزار !؟
جالك هاتف و رمالك أفكار !؟
و قال لك تبدأ تانى نفس المشوار
مش إنت إلى بإيدك مسكت المُنشار
و قطْعت الجسور و ماخلتش إختيار
دا بنبرة صوتك منعت الحوار
و بحزم و قوة أخذت القرار
***
شايف دايما الصورة بالمقلوب
و فاكره ياعينى آل إيه إسلوب
و إنت على عقلك كُتلة غشاوه
و فى قلبك صخر و حجاره ياماَ
لو بفكرك هاتمشى عكس المسار
هاتعيش لوحدك كده محتار
و إذا ناديت على صاحب أو حتى جار
هاتسمع صدى صوتك ليلل و نهار
***
و ماتلومش إلا ذاتك
لأن ده ثمرة جهادك
لو تعدل برواز حياتك
هاتشوف طريقك مظبوط
الطريق واضح أُدامك
بس لو شوفته بعيون إلى بيحبوك
و لو نسيت حُبك لذاتك
السلام فى قلبك يسود

يعنى كده مثلا ّ/(*ث*)\ّ .. ممكن !؟

فرحانين كُنا ولا زعلانين ..بنرسمها
مجروحين ,مظلومين وساكتين ..راسمنها
مجبورين على البُعد و الجرح كبير ..و بنلصمها
نزرع الفرحه فى قلوب المحتاجين
و معاهم بنجرى نخطفها
و سألنا الطبيب ..هانستنا كتيرعشان نعيشها !؟
أصلِ فى الدنيا دى هانشكى لمين !؟
ما هو إلى بيقدر يوجدها
و انا نفسى أعيشها بجد
و تفضل جوه الأُذِين
مش بس أرسمها
ًً

رؤيـــه

هى الدنيا كده بحالات
ساعات تدينا وتكفـْينا
و ساعات تُخنؤنا من سُـكات
و لو الفرح فى مره زاد
نضحك بخوف من بـُكره إلىِ جاى
لا بغدره يبكينا و يـِكسرالضحكه فينا
والآه تخلع قُلوبنا ونعيش زى الجماد
و فى العتمه نقف نصلى
يارب إحفظنا فِ ثبات
و نرجع نُـشكر على الفرحه القليله
حتى لو كانت عمرها ساعات

زودونى سَنه

بتمُر سنينى و مافًضلش غيرىِ

لوحدى مع نفسى و الدنيا بتلهينى

كل سََنه بيزودونى سََنه

و انا بجرى و العب و راضى بنصيبى

طريقى مرسوم بألف لون

ساعات بلون الفرح

و ساعات بلون هموم

تشوفنى بضحك بس بوشى

وانا من القلب بجد نفسى

بحب احيانا أعيش بجنون

أطير فى الهوا و الّـفْ الكون

و كتير بتأثر و بفضل ألوم

و أعيش فى الظلمه هادى مكنون

م انا حالى كده زى بالتة اللون

كل شويه تلائينى بلون

و العيال أصحابى تركونى ألون

ماهو فعلا ..!!

فى حد يصاحب شخص مجنون !؟

شوية جنان

لما خرجت بعينى بره اللوحه

قومت شوفت غلطه كبيرة مفضوحه

نسيت و رسمت من غير اللوان

فطلعت خطوطى كلها ملوحه

يمكن عشان مُخى كان تعبان ..!؟

قال يعنى الالوان ها توزن قال

ما هو بكده ها كون برضه فنان

أصلى الفن كله جنان فى جنان

وانا لسه متخرج من المرستان

إيه المصير .!؟

لما فكْرت بحكمه مش بصوت و جعير

و سألت إلهى .. إيه المصير .!؟

جاوبنى و قال لى .. خليك حليم

قولت انا تعبت .. و هَمّى ثقيل

قال لى .. شايف قلبك من غير تفسير

بَكيت , انا راضى بمَشيئتك فى حياتى

بس إرشدنى فـ طريقى و لحد نِهايَتى

إسكُنى و قوينى .. إحمينى من ذاتى

تفكيرى محدود و من حُزنى مكبوت

و نظرى ضعيف و ماشى بتلطيش

شكلنى من تانى او غيرلى شُريانى

خلينى أستحق أكون بنتك

مش بنت مشغوله بعالم فانى

!!.. لسه نقطه

بنفضل نِشيل على قد ما نِشيل
و نُقف نزعء بصوت و نِفير
دا انا ماشى و لسه المشوار طويل
و صابر قلبى .. و حِمله تئيل
بس أنا عارف , إذا كان همًى كبير
هاوصل بنعمته للحل المُستنير
و فـ ثانيه .. الحُزن من فرحى هايغير
دا هو إلى قادر على كل تغير
و بحكمته وَجد الِقصه .. و معاها التفسير
بس للِيفهم من غير تشكك ولا تأويل
بقلب .. بضمير و إيمان سَليم
حتى لو ضِعف .. و سَقط فى قلب الِبير
عارف إنه خارج من تانى للنور
بقوة إيمانه فى حِكمتْ التدبير
و يرجع تانى بكل حنين
يقوله سامحنى
دا انا لسه نقطه .. مهما كُنت كِبير

أنا .. و زمانى

انا ضاعت منى ألوانى .. فُرشى حتى أحلامى

ألوانى يعنى كيانى .. يعنى حياتى و أيامى

صعب ألائى ألوان علشانى

دا إذا كان فى نبض أرسم من تانى

أصلها ماكنتش ألوانى .. دى كانت ألوان حد تانى

بس زمانى إلًى إدهانى .. و أخدها منى فى ثوانى

و أنا علشان خاطر الحد التانى .. سبتهاله

و مش عاوزه حاجه من زمانى تانى

خُردة

كلما نظرت لهذا المشهد

أتذكر كلمات صلاح جاهين

*
*

قالوا الشقيق بيمُص دم الشقيق

والناس ما هياش ناس بحق وحقيق

قلبي .. رميته وجبت غيره حجر

داب الحجر ورجعت قلبي رقيق

و عجبى

نظرة جديدة

حاجات كتيرة ملخبطه

و حطان بعيدة مشخبطه

هتسأل و تقولى مين أنا ..!؟

هاقولك حمارة بيضة مخططه

عماله ألوم على السينين

و انا إلّى نظرتى بئت مشلفطه

welcome 2008

Merry Christmas
and
A Happy New year

تفتكر .. !؟

يا ترى لسه زى ماحنا زمان !؟

ببراءة الأطفال و الخيال !؟

نفرح من قلوبنا .. ولا هَم عَلى البال

ولا عارفين ألوان السِنين

ولا حتى حاسبين لأى إحتمال

و مع كل عيد نطلب و نسأل

هانجيب إيه جديد !؟

و نِدبْدب و نعيًط .. عاوزين كل الحاجات

ونجرى نعلق فى الشجرة الكور و الزينات

و نِبات سهرانين مُترقبين من سُكات

نسمع صوت جرس أو نحس بخطوات

يمكن لما يجى نشوفه .. و تتحقق التنبؤات

و نصحى نلاقى فى أحضانا لفه بفيونكات

و يقولوا ده عدا و ساب هديه ملفوفه بحركات

و نفضل نِنده .. يمكن نشوفه كده ماشى هناك

و تبدأ سنة جديدة و معاها شوية أمنيات

و نِدعى من قلوبنا

إنها تكون أجمل و بصحه مش بمسكنات

و التعلب فات فات و فى ديله سبع لفات

*

*

من فضلك أترك العيدية .. بعد سماع صوت الصُفارة

;)

كل عام و الجميع بخير

يا ستّار

دخلت قلب أدور على ساتر

أحتمى فيه من غير ما اكابر

دخلت و قولت أنا .. يا ساتر

لاقيت جدران قديمة مشخبطة

و سلاسل كبيرة مربطة

وجراح كتير مش متْضمضه

و زحمة كلام و أحلام زمان

وناس كبيرة , وكمان عيال

بالرغم من البعد و طول المشوار

بس إلى بيدخل القلب بيتحول جدار

و لو خرج .. فى ثانية بيتهد العقار

علامات كتيرة منحوته فى كل مسار

مع كل أزميل بينحت و مسمار

بالتاريخ و اليوم .. دا الجرح بتار

وقفت أدعى من جوه القلب

يا ستّار .. يالى شايف الأزمة

إوجِد المسار

حالة إنتظار

انا قلبى ده قارب خشب

لكن ياخساره شراعه مَكسور

كان نفسه يوصل لكل قلب مشطور

يعطي له شريانه لحد مايُصلب الطول

لكن الريح شِديد والموج بيثور

و انا حِملى كبير و مازلت صبور

مع كل شط بقابل ناس

ترميلى فى حمل وتسيبنى أحتاس

وارجع من تانى أجدف بحماس

مجدافى قلم و فٌرشه و حبة أحبار

بس تعبت خلاص من طول المشوار

داب منى قلمى والفُرشه غاصت فى البحار

و لسه ساكت بادعى و فى حاله إنتظار

إن ربى يرشدنى بنور الفنار

إدينى فُرصه

إدينى فُرصه أرسملك فكرة

إسمعنى وانا اوصفلك بُكره

انا عارف إن جوه قلبك نُقطة

مع إن قلبك طيب بالفطرة

و بقوة إيمانه هايعدى المِحنَه

بس إثبت بِجداره.. إنك قد الشِدة

وهو سامعك و هايبعتلك بركه

دا نوره فى قلبك .. لأنه ساكن من جوه

وفى وجوده ..إوعى تحمل هم

ولا حتى تزعل لحظه